专家拆局：莱比锡上盘偿拿帅心愿

赢埋杜塞就通杀

德甲踢到第15轮，今季争持嘅激烈程度绝对係十几年来之最，随住拜仁同多蒙特表现持续唔稳定，令到列强都蠢蠢欲动，希望把握难得机会挑战德甲宝座，「小富豪」RB莱比锡就係其中之一，今晚作客面对已经跌落降班区嘅杜塞尔多夫赢面极高，莱比锡让一球，上盘係稳阵之选。

未分析呢场波之前，先分享吓德国网站《踢球者》做嘅今轮对赛球队有趣数据，首先係拜仁慕尼黑对云达不来梅，原来拜仁嘅甘美治同不来梅嘅卡拉臣，係今季德甲跑得最多嘅两位球员，经过14轮比赛，甘美治跑咗170公里，卡拉臣亦跑咗166公里；至于科隆对利华古逊，利华今季平均每场跑咗120.3公里，德甲最多，相反科隆只跑111.7公里最少，位列包尾冇得怨人，呢场唔使讲大家都知黑柴会捧利华；听日至踢嘅史浩克04对法兰克福，两队进攻手段截然不同，法福今季共有321次两翼传中波最多，史浩克只有137次最少，淨係法福嘅菲腊高斯迪已经有109次传中，几乎追到史浩克全队。

华拿近6仗10入球5助攻

至于呢场杜塞尔多夫对莱比锡，莱比锡32岁少帅拿高斯文近期春风得意，除咗带领球队喺欧联分组赛首名出线外，德甲亦5连胜，但原来佢执教至今，已经喺德甲赢过24支球队，只有一队现时德甲队伍未赢过，就係杜塞尔多夫，上季佢带贺芬咸两遇杜塞只係1和1负，喺对方老帅芬基面前未威过，今晚当然希望可以刷埋呢个数据啦！莱比锡前线拥有德甲最弗射手迪姆华拿，佢近6场正式赛事合共交出10个入球同5次助攻，近况更胜拜仁利云度夫斯基，翼锋沙比萨同尼干古亦大勇；杜塞上轮吞完多蒙特5蛋，今仗仲有中场艾法度摩拉利斯停赛，冇本钱做拦路虎。