专家拆局：艾萨德让主坚抵捧

沙维带兵东道主抢头彩

周四凌晨世冠盃在卡塔尔多哈拉开战幔，东道主艾萨德同大洋洲代表希安坚体育会上演资格赛对决。由西班牙名宿沙维执教嘅艾萨德，阵中有前马体会队长基比助拳，实力不容忽视，况且东道主不嬲喺世冠盃都有唔错表现，呢场艾萨德有望藉地利，大炒名不见经传嘅希安坚体育会，让两球照捧让球主胜。

喺巴塞隆拿多年嚟赢尽各大奖盃同荣耀嘅沙维，离开西班牙之后近年喺卡塔尔绽放馀晖，上季以球员身份带领当地劲旅艾萨德喺联赛封王嗰阵，已经係「半踢半教」嘅状态。呢位职业生涯经历丰富嘅昔日巴塞中场大脑，球员时代踢波靠食脑填补身形上嘅不足，今季佢正式转换角色执起球队教鞭，相信一班艾萨德球员有佢教路必定获益良多。阵中有前马体会队长基比，同曾经喺欧洲揾食嘅卡塔尔国脚阿菲夫出任攻击手，艾萨德整体实力有保证。

希安坚体育会经验输蚀

东道主代表过去出战世冠盃资格赛不嬲强势，近4届资格赛东道主球队法定时间内取得3胜1和，其中同嚟自大洋洲嘅对手实力不济都有关係。呢次新喀里多尼亚球队希安坚体育会以大洋洲冠军身份参战，经验同实力都肯定输条街，呢场难逃大败，一于力捧让球主胜。